एक क्षण मिठीत घे ना

“सोहम… तू माझ्याशी असा का वागतोयस?” जानवीचा आवाज हलकासा थरथरत होता.
सोहमने तिच्याकडे न बघताच उत्तर दिलं, “काही नाही जानवी… फक्त कामाचा stress आहे.”
“पण एक महिना झाला आपल्या लग्नाला… अजूनही तू माझ्याशी परक्यासारखा का वागतोयस?”
तो काही क्षण शांत राहिला… आणि मग फक्त एवढंच म्हणाला, “Please… मला आता बोलायचं नाही.”

त्या एका वाक्याने जानवीच्या मनात काहीतरी तुटलं.

तिच्या हातातल्या मेहंदीचा रंग अजून पूर्ण उतरला नव्हता… पण तिच्या आयुष्यातलं रंग मात्र हळूहळू फिकट व्हायला लागलं होतं. लग्नाला फक्त एक महिना झाला होता, आणि घरातल्या प्रत्येक गोष्टीत नव्या नवरीचा गोडवा असायला हवा होता. पण तिच्या संसारात काहीतरी वेगळंच चाललं होतं. सोहम तिच्याशी बोलायचा, पण फक्त गरजेपुरतंच… जणू काही तो तिचा नवरा नसून एक अनोळखी माणूस आहे.

घरात सगळ्यांसमोर तो व्यवस्थित वागत असे, पण एकटे असताना त्याच्या चेहऱ्यावर एक थंडपणा यायचा. जानवी अनेकदा त्याच्याशी बोलायचा प्रयत्न करायची, त्याच्या जवळ बसायची, पण तो नेहमी काहीतरी कारण सांगून उठून जायचा. “काम आहे”, “मीटिंग आहे”, “थकलोय” — ही त्याची कायमची उत्तरं झाली होती. तिच्या मनात प्रश्नांची गर्दी होती, पण उत्तर देणारं कोणीच नव्हतं.

एक दिवस रात्री, ती त्याच्याकडे शांतपणे बघत बसली होती. तो मोबाईलमध्ये गुंतलेला होता. त्याच्या चेहऱ्यावर एक हलकी स्मितरेषा होती… जी ती कधीच पाहिली नव्हती. जानवीला थोडं विचित्र वाटलं. तिने हलकंसं विचारलं, “कोणाशी बोलतोयस?”
सोहम थोडासा दचकला, आणि लगेच म्हणाला, “ऑफिसचं काम आहे.”
पण त्या उत्तरात काहीतरी खोटेपणा होता… जे तिच्या मनाला टोचून गेलं.

दुसऱ्या दिवशी जानवी तिच्या मैत्रीण स्वातीला भेटायला गेली. स्वाती तिची खूप जवळची होती, तिच्या प्रत्येक भावना समजून घेणारी. जानवीने सगळं सांगितलं… सोहमचं वागणं, त्याचा दुरावा, आणि तिच्या मनातला वाढता संशय. स्वाती शांतपणे ऐकत होती. मग ती म्हणाली, “जानवी… काहीतरी आहे. तू असंच दुर्लक्ष करू नकोस. शोध घे.”

त्या शब्दांनी जानवीच्या मनात एक नवा विचार जन्माला आला.
ती आधी स्वतःलाच समजावत होती… “सगळं ठीक होईल”, “थोडा वेळ दे”, पण आता तिला जाणवलं — काहीतरी चुकतंय.

त्या रात्री, सोहम बाथरूममध्ये असताना त्याचा मोबाईल टेबलवर होता. जानवीच्या हातांनी नकळत तो मोबाईल उचलला. तिचं हृदय जोरात धडधडत होतं… जणू काही ती काहीतरी चुकीचं करणार आहे.
पण मनात एकच आवाज होता — “सत्य जाणून घे.”

तिने मोबाईल अनलॉक केला… आणि WhatsApp उघडलं.

पहिल्याच चॅटवर नाव होतं — “Priya ❤️”

जानवीच्या डोळ्यांसमोर सगळं धूसर झालं.

तिने थरथरत्या हातांनी चॅट उघडलं…
“Miss you jaan…”
“कालची भेट अजूनही डोक्यात आहे…”
“तिच्यापासून लवकर सुट…”

त्या प्रत्येक मेसेजने तिच्या हृदयावर वार केला.

तिचं लग्न… तिचं प्रेम… तिचं आयुष्य…
सगळं एका क्षणात तुटून पडलं.

बाथरूमचा दरवाजा उघडल्याचा आवाज आला…
जानवीने पटकन मोबाईल ठेवला.

सोहम बाहेर आला, आणि नेहमीसारखाच वागू लागला.
जणू काही काहीच घडलं नाही.

पण जानवीच्या आत एक वादळ उठलं होतं.

त्या रात्री ती त्याच्या बाजूला झोपली होती… पण तिच्या आणि त्याच्या मध्ये आता फक्त एक अंतर नव्हतं…
तर एक मोठं सत्य उभं होतं.

तिच्या डोळ्यातून शांतपणे अश्रू वाहत होते…

आणि तिच्या मनात एकच प्रश्न घुमत होता —
“मी कोण आहे त्याच्यासाठी?”

क्रमशः…..